كبش العيد يهرج مريكاني..!
عيد الأضحى المبارك على الأبواب.. على ما يقولوا.. قده يتخاوص، قولوا يا جماعه الخير.. قررنا أنا وعيالي وأهل بيتي .. نتشري (كبش العيد) ونعيد كما الناس، توكلنا على الله.. وهبينا ساني إلى (سيله الغنم) في دار سعد .. ومن عند الباب تلقونا زايد على (ميه نفر).. واحد يقل لك .. تبا (كبش مليح) تربية بيت .. ,واحد يقل لك .. هذا من حق الصبيحة.. وواحد من حق أبين .. وواحد من حق لحج .. وواحد يجي من قفاك ويقل لك .. أنا معاي (كبش ملبود) وواحد يقل لك .. أنا بذبح لك و باجي معاك لا بيتك، وهات من هذا الكلام وكلهم في الأخير يبوا (بيس)..! قولوا درنا في (السيلة ) بين المواشي لما تكسرت رجولنا ، عجبنا كبش- ما شاء الله- السبله سبله واللحم لحم، قلت للدلال .. بكم هذا الكبش.. ؟ قال : أسال الكبش قل له.. كم قيمتك .. بكم بتبيع نفسك ..؟ قلت له: كيف أسأل الكبش.. عاد معاك عقل.. ليه الكبش يعرف يهرج..؟ قال أيوه يعرف يهرج ، قلت أعوذ بالله من الشيطان الرجيم.. يا ناس انتو بتجيبوا لنا الجنان .. اسمعوا بالله عليكم على كلام ، قال .. الكبش يعرف يهرج ويتكلم .. آخر زمان..! رد الدلال : ايوة الكبش يعرف يهرج ، بس انته أساله كم قيمتك..؟ قولوا توكلت على الله ، وسألت الكبش .. كم قيمتك يا كبش..؟ قال : (أمباع ..أمباع) ، قلت للدلال: شوه معناته (أمباع.. أمباع)..؟ قال : معنات (أمباع .. أمباع) يعني (ميتين دولار) .. كل (أمباع) بمية دولار.. ولما يقول الكبش .. ( أمباع .. أمباع) يقصد أن قيمته .. (ميتين دولار) بنقريك كما الجهال .. فيا عيني وتاج راسي .. (الميتين الدولار ) تساوي بالبيس حقتكم الريالات القراطيس .. (سبعين ألف ريال) .. فهمت ذلحين..؟ أيوه فهمت .. الكبش بسبعين ألف ريال ، شوه هذا الخبر .. شوه هذا الكلام ..؟ لا هذا المبلغ كثير .. نحنا جلوس بلا مشاهرة ، ولامعانا بيسه ولا أردي..! رد الدلال : قل للكبش هذا الكلام ، أن المبلغ كبير ، قولوا توكلت على الله وقويت قلبي وقلت للكبش: هذا المبلغ كبير.. أنا باك تنقص لي قليل .. أنا ضبحان .. طفران .. شكعان ؟ رد الكبش : (أمباع .. أمبيع) .. قلت للدلال : شوة معناته .. ( أمباع ..أمبيع) ..؟ قال :: معنات .. (أمباع ) ميه دولار .. ومعنات (أمبيع ) خمسين دولار .. معناته المبلغ كله بكله .. ( ميه وخمسين دولار)- يعني- نقص لك ( خمسين دولار ) .. رحمك مادام أنت بلا مشاهرة ..! طيب .. يادلال .. عادني باه ينقص لي قليل .. شوه تقول..؟ قال : قل له نقص لي عادك قليل.. شوف الكباش ترحم الناس، زايد عليكم أنتوا يا بني آدم، قلت للكبش: عادك نقص لي قليل، خلينا نعيد كما الناس، ياكبش أنا حبيتك من أول نظره ، قال الكبش بصوته كله .. وصاح لما هز السيله: (باع .. باع .. أمباع) .. قلت للدلال : شوه معناته .. (باع .. باع .. أمباع) قال: معناته آخر كلام.. (ميه دولار) .. معاك خراج . وإلا خلاص روح لك .. خلي بقرة تلحسك .. عًيد لك على دجاجه أبو (ألف وخمسمية ريال) .. قلت في نفسي : ايوه الكباش في اليمن .. يهرجوا ويتكلموا ويفهموا .. آخر زمان ، طيب مش يمكن داخل بطن الكبش(مسجله ) .. أو (أمبتري) .. تمشي على بطارية وبرمجه .. وإلا كيف يتكلم الكبش.. بالله عليكم قلولنا..؟ سمع كلامنا الكبش وقال : (بيع .. باع .. أمباع .. أمبيع).. قلت للدلال : شوه يقول الكبش..؟ قال : الكبش يقول .. نعم أحسن لك أشتريه اليوم .. لانه من باكر الكباش بيفعلوا ( أعتصام) .. احتجاجا على (تعويم الريال) .. وحلفوا يمين .. انه لا يمكن يسمحوا لأحد يشتريهم إلا بالقيمة اللي يبوها على كيفهم ، وانته شوف خراجك .. الحجر من القاع والدم من راسك.. أحسن لك تشتري (كبش العيد) من الآن .. قبل ما يعتصموا الكباش ويرفعوا السعر أضعاف مضاعفة..! قلت لعيالي : كيف تشوفوا .. نشتري الكبش ب( مية دولار) ..؟ قالوا : يا أباه أحسن لنا نعتصم مع الكباش .. والعيد .. عيد العافية، وكل عام وأنتوا بخير..!
